آداب زندگی
کتاب کا تعارف:
سیدنا و مولانا رسول الاعظم صلی اللہ علیہ وآلہٖ وسلم کا ارشاد گرامی ہے:
بُعِثْتُ لِاُتَمِّمَ مَکَارِمَ الْاَخْلَاق یعنی میں اعلیٰ اخلاقی قدروں کو درجہ کمال پر پہنچانے کے لئے بھیجا گیا ہوں۔
پیغمبر اسلام حضرت محمد مصطفی صلی اللہ علیہ وآلہٖ وسلم اور آپ کے اہل بیت علیہم السلام ایمان اور حسنِ سیرت کے ان اعلیٰ مدارج پر فائز تھے کہ ان کا کردار پوری انسانیت کے لئے مشعل راہ ہے۔
ان بزرگواروں نے لوگوں کو ایک نیا راستا دکھایا اور حالات کے جبرکے باوجود اپنے معاشرے پر گہرے اثرات مرتب کئے۔ انہوں نے معاشرے کی ترقی اور انسان کے کمال کی خاطر ایک خاص مکتبِ فکر و عمل کی بنیاد رکھی ، لوگوں کو اس کے اتباع کی دعوت دی ، انہیں ایک شاندار مستقبل کی نوید سنائی اور ان کے دلوں میں امید اور امنگ پیدا کی تاکہ وہ اپنی غلط عادتوں کو ترک کرکے ایسی بامقصد زندگی گزاریں جو دنیا اور آخرت میں ان کی خوش بختی کی ضامن ہو۔
اہل بیت علیہم السلام کے اس بلند مقام کو سمجھنے کیلئے ضروری ہے کہ قرآن مجید کی تعلیمات اور معصومین علیہم السلام کے ان ارشادات سے رجوع کیا جائے جن کو عظیم محدث حضرت علامہ محمد باقر بن محمد تقی مجلسی علیہ الرحمہ (متوفی ۱۱۱۱ھ)نے بحارالانوارکے مختلف ابواب میں جمع کر دیا ہے۔
چونکہ دینی مدارس کے طلباء کے لئے اس موضوع پر ایک نسبتاً مختصر کتاب کی ضرورت تھی اس لئے ہم نے حضرت علامہ موصوف کی کتاب حِلیۃُ المُتقین شائع کرنے کا فیصلہ کیا جس کو انہوں نے ائمہ معصومین علیہم السلام کی احادیث کی روشنی میں مرتب کیاہے۔چونکہ یہ کتاب بھی خاصی مفصل تھی اس لئے ہم نے اختصار کے پیش نظرمحدث شیخ عباس قمی علیہ الرحمہ (متوفی ۱۳۵۹ھ ) کی مرتب کردہ مختصر حِلیۃُ المُتقین کو اپنا مأخذ قرار دے کرزیر نظر کتاب ترتیب دی ہے۔
ہمیں امید ہے کہحِلیۃُ المُتقین کی یہ تلخیص طلباء کے لئے بالخصوص اور مومنین کے لئے بالعموم مفید ثابت ہوگی۔