حیات انسان کے چھ مرحلے

: کتاب کا تعارف

 کتاب حیات انسان کے چھ مرحلےمیں علامہ جواد حسینی نے ان چھ مرحلوں کا ذکر کیا ہے جن سے کتاب و سنت کی تصریح کے مطابق وجود انسان کا گزر ہوتا ہے۔پہلا مرحلہ عالم ذر، دوسرا مرحلہ عالم اصلاب ، تیسرا مرحلہ بطن مادر ، چوتھا مرحلہ عالم دنیا ، پانچواں مرحلہ عالم برزخ ، اور چھٹا مرحلہ معاد۔ اس کتاب میں ان تمام مراحل کی معلوماتی تفصیل قرآن و احادیث کی مددسے بیان کی گئی ہیں۔ اس کے آخر میں جنت و جہنم کے بارے میں بعنوان خاتمہ ایک اور باب بھی شامل ہے۔ اصل متن فارسی میں تھا جسے اردو میں ترجمہ کیا گیا ہے۔

قوموں کی نشوونما میں تربیت و تہذیب کا بہت بڑا اثر ہوتا ہے تاکہ وہ اخلاقِ حسنہ سے متصف ہو کر دنیا و آخرت میں سعادت حاصل کر سکیں۔ پس بچہ معاشرے کی تعمیر میں اس پہلی اینٹ کا مقام رکھتا ہے جسے اگر حُسنِ تربیت کے ذریعے صحیح طورپر رکھا جائے تو ساری عمارت صحیح و مستقیم رہتی ہے چاہے وہ کتنی ہی بلند و عظیم ہو۔

جس طرح بیج مناسب زمین اور مناسب آب و ہوا میں مناسب نگہداشت کا محتاج ہوتا ہے اور جس طرح معمار اپنی تعمیر کی سلامتی اور مضبوطی کے لیے صحیح اوزان و پیمائش کا محتاج ہوتا ہے بالکل اسی طرح بچے کے لیے بھی اس کے مختلف میلانات و رجحانات اور اس کی مختلف طاقتوں کے درمیان توازن و اعتدال پیدا کرنے کی ضرورت ہوتی ہے اور وہ بھی مناسب نشوونما کے لیے مناسب ماحول کا محتاج ہوتا ہے۔

مناسب تربیت کی سب سے پہلی ذمے داری والدین کے کاندھوں پر ہوتی ہے کیونکہ گھر ہی بچے کا سب سے پہلا مدرسہ ہوتا ہے اور والدین اس کے سب سے پہلے معلم تسلیم کئے جاتے ہیں۔ اسی لیے رسول اللہ ﷺ نے فرمایا :  ہر بچہ فطرت صحیح پر پیدا ہوتا ہے مگر اُس کے والدین کبھی اسے یہودی بنا دیتے ہیں تو کبھی نصرانی۔

دعا ہے کہ خداوند کریم اس کوشش کو قبول فرمائے اور نوجوانانِ ملت کو توفیق عطا فرمائے کہ وہ اسلام کی تعلیمات سے بیشتر واقفیت پیدا کریں اور ان پر عمل کریں کہ اسی میں ہم سب کی فلاح مضمر ہے۔

اس کتاب کا مقصدیہ ہے کہ ہماری نئی نسل کی تربیت دین اسلام کے مطابق ہو اور ہمارے نوجوان اپنی عظیم ثقافت سے آراستہ ہوں۔