فلسفہ معجزہ

:کتاب کا تعارف

فلسفہ معجزہ دنیائے تشیع کے مرجع اعلیٰ حضرت آیت اللہ العظمیٰ السید ابو القاسم الموسوی الخوئی طاب ثراہ کی مشہور تالیف البیان فی تفسیر القرآن کا ایک حصہ ہے جو اردو قارئین کی خدمت میں پیش کیا جا رہا ہے۔

البیان فی تفسیر القرآن اہم قرآنی مسائل پر مشتمل ہے اور ہر مسلمان اور قرآن مجید کے پیرو کے لیے ضروری ہے کہ وہ ان مسائل سے مکمل طور پر واقف ہو بلکہ بے حد مناسب ہوگا کہ اسے دینی درسگاہوں کے نصاب میں شامل کرکے طلباء کو درسی کتاب کے طور پر پڑھایا جائے۔

یہ کتاب اس لحاظ سے بالخصوص بے حد اہم اور عظیم ہے کہ یہ قرآن مجید سے مخصوص ہے اور اس میں اس آسمانی کتاب کے اہم اور حساس نکات کے بارے میں بحث کی گئی ہے۔

یہ کتاب قرآن مجید کی عظمت ، اس کی معجزانہ حیثیت اور بالخصوص اس کے علمی پہلوؤں کا صحیح صحیح تجزیہ کرتی ہے اور واضح کرتی ہے کہ قرآن مجید ایک زندہ اور تعمیری کتاب ہے۔ یہ ایسا جاودانی معجزہ ہے جو ابد الآباد تک لوگوں کی رہنمائی راہِ راست کی جانب کرتا رہے گا مگر وہ اس رہنمائی کی بنیاد بھی عقل اور انسانی فطرت پر رکھتا ہے ، اس طرح وہ بنی نوع انسان کے کاروان کو انتہائے کمالات کی جانب آگے بڑھاتا ہے اور تمدن اور انسانیت کے بلند ترین مقام پر پہنچا دیتا ہے۔ یہی وجہ ہے کہ قرآن مجید رسول اکرم ﷺ کے دوسرے معجزوں بلکہ تمام انبیاء کے معجزوں سے ممتاز اور بلند تر معجزہ ہے۔

یہ کتاب روشن خیال افراد کے ذہنوں کو جلا بخشے گی اور دین اسلام کو ایک عظیم مکتب اور قرآن کو ایک عظیم کتاب کی حیثیت سے روشناس کرائے گی۔ انشاءاللہ