اسلام دین فطرت
تعارف:
کتاب اسلام دین فطرت آیت اللہ جعفر سبحانی اور آیت اللہ ناصر مکارم شیرازی کی زیر نگرانی علماء کے پینل نے مرتب کی ہے۔ اسےفارسی زبان سے ترجمہ کیا گیاہے۔
اسلام بنی نوع انسان کی فکری اور اخلاقی اصلاح کے لیے دنیا کے بارے میں ایک مخصوص تصور اور ایک ایسے انتہائی موزوں لائحہ عمل کے علم کا نام ہےجسے ایک حرکت پذیرمکب فکر کے طور پر پیش کیا گیا ہے۔ اسلام دین فطرت ہے۔اسلام احکام و ضوابط کے ایک مجموعے اور اس سے وابستہ عملی ہدایات اور تعلیمات کے علم کا نام ہے۔ بد قسمتی سے بعض لوگ اپنے آپ کو محض اس لیے مسلمان خیال کرتے ہیں کہ وہ ایک مسلمان گھرانے میں پیدا ہوئے یا اس لیے کہ انھیں سب سے پہلے اسلام ہی کا خیال آیااور انھوں نے اسے قبول کرلیا۔
ظاہر ہے ایک سچا مسلمان ان باتوں سے مطمئن نہیں ہو سکتاکیونکہ اسلام نہ تو والدین سے بطور وراثت حاصل کی جانے والی چیز ہے اور نہ ہی یہ ماحول کی پیداوار ہے۔ ایک سچے مسلمان کے لیے ضروری ہے کہ وہ اصول اور فروع سمیت اسلام کی تعلیمات کے بارے میں صحیح صحیح علم رکھتا ہو۔ اسلام کے اصول اور تعلیمات سے واقفیت حاصل کرنے کے بعد ان پر اپنی شخصی اور اجتماعی زندگی میں عمل پیرا ہونا بھی ضروری ہے۔
ایک مسلمان کو کم از کم اس قابل ہو نا چاہیے کہ وقت پڑنے پر دو سوالوں کا شافی جواب دے سکے، خواہ وہ جواب کتنا ہی مختصر اور سادہ کیوں نہ ہو:
)الف) اسلام کیا ہےاور کس بناء پر یہ بنی نوع انسان کےلیے رحمت ہے؟
)ب) میں نے اسلام کیوں قبول کیا؟
اس کتاب میں اسلام کی بنیادی تعلیمات کو درج بالا تناظر میں کسی حد تک جامع انداز میں پیش کیا گیا ہے۔ اس کتاب کی تیاری میں اسلامی عقائد اور فقہ پر لکھی گئی بہت سی کتابوںسے استفادہ کیا گیا ہے۔ چنانچہ کئی ایک مطالب جن کے بارے میں ضخیم کتابوں میں کئی ابواب تحریر کیے گئے ہیں، اس کتاب میں چند لفظوں یا چند سطروں میں بیان کردیے گئی ہیں تاہم ایک واضح اسلوب تحریر اپنانے اور کتاب کی استدلالی روح برقرار رکھنے کی پوری کوشش کی گئی ہے۔
اس امر کی کوشش کی گئی ہے کہ اسلام کے اصول بیان کرتے ہوے متعلق اسناد کا حوالہ ضرور دیا جائےاور دلیل مہیا کیے بغیر کوئی بات نہ کہی جائے۔ جہاں تک فروع دین اور فقہی مسائل کا تعلق ہے تو جس حد تک ممکن ہو سکا ہے اُن کے تعلیمی اور معاشرتی فلسفے کی جانب توجہ دلائی گئی ہے تاکہ ان پر بہتر بصیرت کے ساتھ عمل پیرا ہونے لے لیے قاری کی حوصلہ افزائی ہو۔
آیات قرآنی اور احادیث نبوی کافی تعداد میں نقل کی گئی ہیں لیکن اختصار کے پیش نظر صرف ان کا ترجمہ دیا گیا ہے۔ صرف ابتدائی ابواب میں یورپی دانش وروں کےبعض اقوال نقل کیے گئے ہیں۔
یہ کتاب بالخصوص نوجوانوں کے اذہان کو جلا بخشنے میں معاون ثابت ہوگی اور انہیں اس جانب راغب کرے گی کہ وہ اسلام کو ایک عظیم تخلیقی مکتب کی حیثیت سے پہچانیں۔ اس سے بیش از پیش محبت کریں اور اس کی خاطر ہر ممکن قربانیاں دیں۔ یہ کتاب نوجوان نسل کو ایک صحت مند اور ترقی پسند معاشرہ تشکیل دینے کی جانب راغب کرے گی۔ ان شاء اللہ