علوم الحدیث کا تعارف

:کتاب کا تعارف

علوم الحدیث کا تعارف  معروف شیعہ عالم دین حجت الاسلام علی نَصیری کی فارسی کتاب   ’’ آشنائی باعلوم حدیث‘‘ کا اردو ترجمہ ہے۔

’’ سنت ‘‘ قرآن کے بعد دین کی پہچان کا دوسرا منبع ہے کیونکہ سنت کلیات قرآن کی تفسیر بیان کرتی ہے۔ سنت ، قرآن کریم کے پہلو بہ پہلو شناختِ دین کے تمام مراحل میں ہماری  رہنمائی کرتی ہے۔ یہی وجہ ہے کہ رسول اکرم ﷺ نے اپنی سنت کو قرآن کا مثل قرار دیا تھا اور آپ اسے اپنے اوپر قرآن کے بعد خدا کی دوسری عنایت سمجھتے تھے۔

رسول اکرم ﷺ اور ائمہ اہل بیتؑ کی جو احادیث و روایات ہم تک پہنچی ہیں اُن میں گوناگوں سیاسی اور سماجی عوامل کی وجہ سے تحریف ہوئی ہے لیکن تمام تر مشکلات کے باوجود بہت سے ایسے دیانتدار راوی اور محدث گزرے ہیں جنھوں نے کٹھن حالات میں بھی احادیث کے قیمتی ذخیرے کو سینہ بہ سینہ اور صفحہ بہ صفحہ نقل کیا اور انھیں راہزنوں کی دست برد سے بچا کر بحفاظت ہم تک پہنچایا۔ احادیث کے طومار میں سے صحیح احادیث کے استخراج اور کلامِ معصوم کے جوہر کی پہچان کے لیے ایسی چابیوں (اصول و قواعد) کی ضرورت ہے جن سے اس خزانے کے بند دروازوں کو کھولا جا سکے۔ انہی اصول و قواعد کو علوم حدیث میں بیان کیا جاتا ہے۔

اس وقت جو کتاب آپ کے ہاتھوں میں ہے یہ حدیث شناسی کے موضوع پر دو جلدوں میں لکھی گئی کتاب کا خلاصہ ہے۔ اس کتاب میں علم حدیث کو چار بنیادی اَقسام تاریخ الحدیث ، درایۃ الحدیث یا مصطلحات الحدیث ، رجال الحدیث اور فقہ الحدیث میں تقسیم کیا گیا ہے۔چونکہ حدیث کی حجیت اور اس کی کچھ تعریفات کو جاننا بہت ضروری ہے ، اس لیے کتاب کے پہلے باب میں ’’ کلیاتِ علم حدیث کی پہچان ‘‘ کے عنوان سے گفتگو کی گئی ہے۔

اہل سنّت اور اہل تشیّع کی تاریخِ حدیث میں بہت زیادہ فرق ہے ، اس لیے تاریخِ حدیث کو ’’ اہل سنت کی تاریخِ حدیث ‘‘ اور ’’ اہل تشیع کی تاریخِ حدیث ‘‘ کے دو علاحدہ ابواب میں تقسیم کیا گیاہے اور مباحث کتاب کے لیے چھ ابواب قائم کئے گئےہیں۔

 ’’علوم حدیث‘‘ کےابتدائی پہچان کے لیے حجۃ الاسلام علی نصیری کی اس کاوش کو ہر خاص و عام ، علماء و طلباء سب نے بہت سراہا ہے اور اسے نصابی کتاب قرار دیاہے کیونکہ اس میں علوم حدیث کی بہت سی خصوصیات پر گفتگو کی گئی ہے۔

            یہ کتاب ’’ علم حدیث ‘‘ کو وسعت دینے ، اس میں سوچ بچار کرنے اورحدیث کا مطالعہ کرنے والے تمام احباب بالخصوص طلباء و طالبات کے کے لیے مفید ثابت ہوگی۔ ان شاءاللہ

قارئین کرام ! جامعہ تعلیمات اسلامی اس بات سے بالا تر ہو کر کہ عوام الناس کے لیےکون سا موضوع زیادہ مرغوب ہے ، مفید اور اہم ترین علوم اور موضوعات پر مبنی کتابوں کو اردو بولنے اور سمجھنے والوں خاص کربرصغیر کے مسلمانوں کے لیے عربی فارسی اور دیگر زبانوں سے اردو ترجمہ کرانے کا سلسلہ جاری  رکھے ہوئے ہے کیونکہ امام جعفر صادق علیہ السلام  فرماتے ہیں (علم کو) لکھو اور (اس ذریعے سے محفوظ کر لو)۔ اپنے علم کو اپنے بھائیوں میں عام کرو۔ اگر تم مر جاؤ تو اپنی اولاد کو اپنی کتابوں کا وارث بنا دو کیونکہ عنقریب لوگوں پر ایسا مشکل زمانہ آنے والا ہے جب وہ اپنی کتابوں کے سوا دوسری کتابوں کی طرف مائل نہیں ہوں گے۔

اللہ تبارک و تعالیٰ سے دعا ہے کہ قرآن و حدیث سے مستفید ہونے کی صلاحیت عطا فرمائے، محرمات سے بچنے کی توفیق عنایت فرمائے اور  تقویٰ کی دولت سے مالا مال فرمائے۔