درایت الحدیث
:مصنف کاتعارف
شیخ کاظم مدیر شانہ چی کا شمار حدیث و روایت کے ممتاز محققین میں ہوتا ہے۔ وہ ۱۳۰۶ ش ق میں ایران کے شہر مشہد میں پیدا ہوئے اور ۱۳۸۱ ش ق میں وہیں انتقال کر گئے۔ان کے اساتذہ میں شیخ ہاشم قزوینی ، سعید یونسی اردبیلی ، آیت اللہ خوئی ، میرزا احمد کفائی اور سید محمد ہادی میلانی قابل ذکر ہیں۔
آپ ایک ماہر کتاب شناس ، نسخہ شناس اور مخطوطات شناس تھے۔ اس حوالے سے کئی فہرستیں شائع ہوئیں۔آپ نے اپنی تحقیقات میں شیعہ اور سنی کی معتبر کتابوں کو موضوع بنایا اور بہت سی قابل قدر کتابیں اور مقالات تحریر کئے۔ مخطوطات پر تحقیق کے سلسلے میں آپ نے روس ، آذر بائیجان ، ازبکستان ، مصر ، ترکی ، شام ، لبنان سے مخطوطات اور قدیم قلمی نسخوں کی عکس برداری کی۔ آپ نے مشہد یونیورسٹی میں تدریس کے علاوہ آستان قدس رضوی کے شعبہ حدیث کے سربراہ کی حیثیت سے بھی بہت کام کئے۔
تاریخ حدیث ، درایۃ الحدیث ، علم الحدیث ، ترجمہ و شرح تبصرۃ المتعلمین ، روش استنباط ، آیات الاحکام (۲ جلدیں) ، تاریخ فقہ مذاہب اسلامی ، مزارات خراسان ، تاریخچہ ادوار منطق ، فقہ و حدیث پر ایک تحقیقی نظر (مجموعہ مقالات) اور انٹرویوز وغیرہ استاد شانہ چی کی چند مطبوعہ کتابیں ہیں۔
:کتاب کاتعارف
درایت الحدیث، شیخ کاظم مدیر شانہ چی کی فارسی کتاب درایۃ الحدیث کا فارسی درایۃ الحدیث کا اردو ترجمہ ہے۔ علم درایہ میں حدیث کی سند ، متن ، اس کے حصول کی کیفیت اور نقل حدیث کے آداب پر گفتگو کی جاتی ہے۔ علم درایہ کا موضوع سند اور متنِ حدیث ہے۔سند یعنی راویوں کا ’’سلسلہ ‘‘ جس کی کڑیاں متنِ حدیث کو معصوم تک پہنچاتی ہیں۔ اس علم کا فائدہ اور مقصد یہ ہے کہ مقبول اور مردو احادیث کی شناخت ہو سکے۔
اس کتاب کی تیاری میں درایۃ الحدیث کی امہات الکتب سے استفادہ کیا گیا ہے۔، فریقین کی کتابوں کا تحقیقی مطالعہ کا نچوڑ بیان کیا گیا ہے ۔ اس کے ساتھ مزید فائدے کے لیے جامع اور مختصر تعریفات کو بھی کتاب میں شامل کیا گیا ہےتاکہ طلباء انھیں آسانی سے یاد کر سکیں۔ واضح رہے کہ علمی ماہرین کے ہاں مختلف مفاہیم کی تعبیر اور نام میں اختلاف پایا جاتا ہے اور شیعہ اصطلاحات ، اہل سنت کی اصطلاحات سے جدا ہیں اس لیے دونوں کو بیان کیا گیاہے تاکہ جب کوئی اہل سنت کے مجامع حدیث کا مطالعہ کرے تو اسے ان کی اصطلاحات کو سمجھنے میں کوئی مشکل پیش نہ آئے۔ کتاب ہذا میں یہی معروضات صاحبانِ فکر کے سامنے پیش کی گئی ہیں کہ جو اس حقیقت سے بخوبی آگاہ ہیں کہ بظاہر آسان دکھائی دینے والا یہ کام کتنا مشکل ہے۔
قارئین کرام ! جامعہ تعلیمات اسلامی اس بات سے بالا تر ہو کر کہ عوام الناس کے لیےکون سا موضوع زیادہ مرغوب ہے ، مفید اور اہم ترین علوم اور موضوعات پر مبنی کتابوں کو اردو بولنے اور سمجھنے والوں خاص کربرصغیر کے مسلمانوں کے لیے عربی فارسی اور دیگر زبانوں سے اردو ترجمہ کرانے کا سلسلہ جاری رکھے ہوئے ہے کیونکہ امام جعفر صادق علیہ السلام فرماتے ہیں (علم کو) لکھو اور (اس ذریعے سے محفوظ کر لو)۔ اپنے علم کو اپنے بھائیوں میں عام کرو۔ اگر تم مر جاؤ تو اپنی اولاد کو اپنی کتابوں کا وارث بنا دو کیونکہ عنقریب لوگوں پر ایسا مشکل زمانہ آنے والا ہے جب وہ اپنی کتابوں کے سوا دوسری کتابوں کی طرف مائل نہیں ہوں گے۔
اللہ تبارک و تعالیٰ سے دعا ہے کہ قرآن و حدیث سے مستفید ہونے کی صلاحیت عطا فرمائے، محرمات سے بچنے کی توفیق عنایت فرمائے اور تقویٰ کی دولت سے مالا مال فرمائے۔