حکایات قرآن

:تعارف

معتبر اقوال کے مطابق قرآن کریم ۶۲۳۶ آیات پر مشتمل ہے۔ قرآن حکیم کے موضوعات اور مطالب کو چار حصوں یعنی عقائد,احکام ,اخلاق اور حکایات میں تقسیم کیا جا سکتا ہے۔

یہ تو ظاہر ہے کہ داستانیں سننے اور پڑھنے کا شوق انسان کی فطرت میں ہے۔ تاہم قرآن کریم ہی وہ پہلی کتاب ہے جس نے قدیم قوموں کے حالات اور واقعات کوانسانیت کی تعلیم اور تربیت کے لیے استعمال کیا ہے اور انسان کے اس طبعی شوق اور رغبت کو اس کی ہدایت کا وسیلہ بنایا ہے۔ چنانچہ قرآن مجید اپنی متعدد آیات میں اس حقیقت کی تصریح فرماتا ہے اور یاد دلاتا ہے کہ ہم سابقہ قوموں کی داستانیں اس لیے بیان کرتے ہیں کہ لوگ سوچیں ، اپنی عقل کو کام میں لائیں اور جو کچھ پہلے لوگوں پر گزری ہے اس سے نصیحت پکڑیں۔

قرآن کی بہت سی آیات ایسی حکایات پر مشتمل ہیں جو بڑی سبق آموز اور عبرت آمیز ہیں اور فلسفۂ تاریخ کی رُو سے سبھی لوگ ان سے استفادہ کر سکتے ہیںچنانچہ قرآن کریم خود یہ تصریح کرتا ہے کہ گزشتہ قوموں کے قصے بیان کرنے کا واحد مقصد لوگوں کو بیدار کرنا اور انھیں ان اقوام کے حالات اور واقعات سے عبرت حاصل کرنے پر آمادہ کرنا ہے ۔ لہٰذا اس کی تلاوت کرنے والوں کو چاہیے کہ وہ اس مقدس کلام کو مکمل غور سے پڑھیں اور اس کے ترجمے اور تفسیر پر بھی توجہ دیں تاکہ وہ اس اصلی مقصد کو سمجھ جائیں جو قرآن مجید کے پیش نظر ہے۔

چونکہ عام لوگ قرآن پاک اور اس کے سبق آموز مطالب سے براہ راست بہت کم استفادہ کرسکتے ہیں۔ اس لیے زیر نظر کتاب میںصرف قرآنی قصے نقل کئے گئے ہیں۔ اس ضمن میں ہم نے یہ کوشش کی ہے کہ ان قصوں کو بہت سادہ اور آسان الفاظ میں لکھا جائے تاکہ عام لوگ انھیں بخوبی سمجھ سکیں اور پہلی قوموں کی سرگزشت سے عبرت کا حصول زیادہ آسان ہوجائے۔

اس کتاب میں انبیاء علیہم السلام اور سابقہ قوموں کی تاریخ ائمہ طاہرینؑ کی روایات کی مدد سے لکھی گئی ہے اور پھر رسول اکرم ﷺ کی بعثت سے لے کر غدیر خم تک کے واقعات اجمالاً بیان کئے گئے ہیں۔ ضمنی طور پر واقعۂ غدیرکا بیان اور اس کی تکمیل کے لیے پیغمبر اسلام ﷺکی خلافت کے موضوع پر بھی اظہار خیال کیا گیا ہے۔

ہمیں امید ہے کہ پاکستان اور دنیا بھر کے فرزندان توحید قرآن مجید کی تعلیمات سے آشنائی حاصل کرکے ان پر عمل پیرا ہوں گے اور امت مسلمہ کی عظمت رفتہ کو بحال کرنے کی کوششیں کریں گے۔ ان شاءاللہ

قوم آوارہ عناں تاب ہے پھر سوئے حجاز لے اڑا بلبل بے پر کو مذاق پرواز

مضطرب باغ کےہر غنچے میں ہے بوئے نیاز تو ذرا چھیڑ تو دے تشنہ مضراب ہے ساز

نغمے بے تاب ہیں تاروں سے نکلنے کے لیے

طور مضطر ہے اسی آگ میں جلنے کے لیے