(اسلامی عقائد قرآن کی روشنی میں (دو جلدیں
مؤلف کاتعارف:
علامہ سید مرتضیٰ عسکری ایک مایہ ناز شیعہ عالم اور بے بدل محقق تھے۔ شیعہ اور سنی علمی حلقے آپ کے علمی تبحر کے معترف ہیں۔ تاریخ اور حدیث کے میدان میں آپ کا کام ایک سند کا درجہ رکھتا ہے۔تحقیق کے میدان میں آپ ایک نابغہ روزگار شخصیت ہیں۔ آپ کی کتابوں کا تمام عالم اسلام میں شاندار استقبال کیا گیا۔ آپ کی کتاب ’’ عبداللہ بن سبا اور دیگر تاریخی افسانے ‘‘ تحقیق کے میدان میں ایک لاثانی کتاب ہے۔ آپ نے سینکڑوں علمی اور تحقیقی کتابیں لکھیں جنھیں علمائے اسلام نے ہاتھوں ہاتھ لیا اور آپ کی کاوشوں کو خراج تحسین پیش کیا۔ آپ نے ۱۶ ؍ ستمبر ۲۰۰۷ء کو داعی اجل کو لبیک کہا۔
مائۃ و خمسون صحابی مختلق ۳ جلد ، عبداللہ بن سبا و اساطیر اخرٰی ۲ جلد،احادیث ام المومنین عائشہ ۳ جلدمعالم المدرستین ۳ جلد ، القرآن الکریم و روایات المدرستین ۳ جلدمقدمہ مرآۃ العقول ۲ جلد،الصحابی و عدالتہ ، عقائد الاسلام من القرآن الکریم ۳ جلد قیام ائمہ باحیاء دین آپ کی چند مشہور کتابیں ہیںان میں سے اکثر کتابوں کا فارسی ، انگریزی ، اردو ، ترکی اور دیگر زبانوں میں ترجمہ ہوچکا ہے۔
کتاب کا تعارف:
اسلامی عقائد قرآن کی روشنی میں، علامہ عسکری کی تالیف " عقائد الاسلام من القرآن الکریم" کا اردو ترجمہ ہے۔ اس کتاب کے بارئے میں خود علامہ عسکری فرماتے ہیں: ''قرآن مجید اسلامی، عقائد کو انتہائی سلیس اور سادہ انداز میں پیش کرتا ہے۔ قرآن مجید نے اپنے استدلال کی بنیاد بھاری بھرکم اصطلاحات پر نہیں رکھی۔ قرآنی استدلال اتنا سہل اور آسان ہے کہ عربی پڑھا لکھا ہر صاحب شعور انسان اسے اچھی طرح سمجھنے کی صلاحیت رکھتا ہے۔ اسی وجہ سے قرآن مجید نے صرف علماء کو ہی اپنا مخاطب قرار نہیں دیا بلکہ وہ یَااَیُّہَا النَّاسُ کہہ کر تمام انسانوں کی توجہ اپنی جانب مبذول کراتا ہے۔جب ہم قرآن کریم کو دیکھتے ہیں تو ہمیں اسلامی عقائد ایک زنجیر کی طرح ایک دوسرے سے مربوط نظر آتے ہیں۔ اس کا ایک حلقہ دوسرے حلقے کی طرف رہنمائی کرتا ہے۔ عقائد کے تمام حلقے مل کر اسلامی عقائد کی پوری زنجیر بناتے ہیں اور عقائد کا ہر حلقہ دوسرے حلقے کی تکمیل کرتا ہے۔ چنانچہ اس کتاب کی ترتیب اور مضامین کی تشکیل کے لئے قرآن مجید سے بھرپور رہنمائی حاصل کی گئی ہے۔جب تک عقائد اسلام کا مطالعہ اس قرآنی انداز سے نہ کیا جائے ان کی حکمت اجاگر نہیں ہوسکتی'۔
پہلی جلد میں میثاق الست یعنی بندگان و بندگان خدا کے درمیان معاہدہ کب کہاں کیسے ہوا؟عالم غیب کے متعلق بے سروپا تصورات،آسمان ، زمین،جنات،شیاطین،انسان کی خلقت،فطری الہام اوروحی کے ذریعے انسان اور جنات کی تعلیم شریعت،جنت یا جہنم میں اعمال کا بدلہ ،جنات بھی اعمال کابدلہ پائیںگے،جبر، تفویض اوراختیار، اور ان جیسے سینکڑوں موضوعات پر بحث کی گئی ہے۔ جب کہ دوسری جلد میں رسولوں اور ان کے اوصیاء کی زندگی کو جامع انداز میں پیش کیا گیا ہےکیونکہ اسلام کے مفاہیم اور اس کے احکام کو اگر کسی نے مجسم انداز میں دیکھنا ہو تو اسے صاحبِ شریعت رسولوں اور ان کے اوصیاء کی سیرت کا مطالعہ کرنا چاہیے۔ رسولوں اور ان کے اوصیاء کی زندگی کا مطالعہ — مبداء سے لے کر معاد تک — اسلامی عقائد کے باب میں درست رہنمائی فراہم کرتا ہے۔
دعاہے کہ خداو ند علی اعلیٰ ان مسلمانوں کے لئے جو قرآن کریم سے آسان اور عام فہم عقائد حاصل کرنے کے خواہاںہیں اس کتاب مستطاب کو مفید بنائے اور قرآن کریم کے پرچم تلے تفرقے سے بچنے کے متمنی اور اتحاد بین المسلمین کے شیدائی افراد کے لئے اس کتاب کو ایک رہنما کی حیثیت عطا فرمائے ۔ آمین